Drug test sa estudyante dapat libre

Human gimando sa presidente nga ipa-ilawom tanan sa Random Drug Testing ang mga tinungha sa sekondarya, mi-alma gilayon ang pipila ka mga ginikanan, sa rason nga tingali another round sa pangwarta na sab sa mga kadagkuan sa Department of Educatio (DepEd).

Diha-diha dayon nadawat ni Education Secretary Jesli Lapus ang maong direktiba gikan sa malakanyang nga nagmando sa mandatory drug testing sa mga tinungha sa tanang tunghaan sa nasud human mi kontrobersyal ang isyu sa ‘Alabang boys.’

Unsa pud kaha ang kalambigitan sa ‘Alabang Boys’ ning random drug testing karon sa DepEd nga gidudahang pagpangwarta lamang.

Hapit na ra ba ang eleksyon sa 2010, kinsa pud lugar ang modagan isip presidente? Well, atong pa-abuton.

Anyway, on the issue of proportion sa ta. Bag-uhay lamang ang Brigada News nakighinabi kang Cagayan de Oro City Schools Division Superintendent Dr. Myrna Motoomull.

Siya miingon, sa pagkakaron ila pang gipa-abot ang konkretong kamandoan gikan sa ilang labaw sa DepEd.

Lugar og ila nang madawat ang maong direktiba, gibutyag sa opisyal nga dili nila kini yanong ipatuman lamang.

“Ato sang sutaon kung unsa ang unod sa maong kamandoan. Dili sa ko mo-conclude,” siya miingon sa pangutana kung uyon ba kini sa maong kamandoan.

Gipasabot pa hinuon sa opisyal nga usa sa iyang sutaon pag-ayo ang epekto niini sa bulsa sa mga ginikanan.

Lugar og dunay bayrunon ang mga ginikanan sa pagpa-ilawom og drug testing sa ilang mga anak, supak matud pa kini si Motoomull.

“Dili na maayo na kung moggasto pa ang atong mga ginikanan, luoy pud intawon,” gidugang pa niya.

Nalakip sa gipa-abot nga direktiba sa DepEd gikan sa Central Office ang mga giya ug balaudnon labot sa implementasyon niini.
Sa laktod nga pagkasulti, pabor si Motoomull nga ipatuman ang maong kamandoan nga wala na nagkinahanglan pa og salapi gikan sa bulsa sa ordinaryong lungsoranon.

Daku matud pa kining tabang isip preventive measure batok sa gidiling drogas.

Sanglit bag-uhay lamang, usa ka report sa telebisyon ang mikanayon nga usa ang mga tinungha sa rehiyon 10 ang numero unong tigpayuhot og gidiling drogas.

Di lamang dugay, pagpamatuod sab niini ang pagpangibot sa mga otoridad og marijuana sa usa ka plantasyon sa Barangay Tignapoloan, Cagayan de Oro.

Ning dakbayan, buot sa opisyal nga ipa-ilawom ang mga tinungha sa drug testing sa nagkalain-laing tunghaan, kini aron mahinloan ang imahe sa siyudad, diin sakop sa rehiyon 10.

Sayong ipatuman ang naasoyng kamandoan, sukwahi sa una nang gikanayon na sulod sa unang semana sa bulan sa Marso.

Karon, kung paghidangat sa direktiba gikan sa DepEd central office nga walay bayad ang naasoyng lakang, wala koy laing masulti kundi ang pulong nga ‘hinaut pa.’

Kay sagad baya sa mga tunghaan, subay usab sa akong kasayoran daw nagpabungol-bungol sa ilang labaw.

Giingon nga walay bayad, apan pag-abot sa pinirmahay na og clearance sa 4th grading didito manggawas ang ubay-ubay nga mga balayrunon.

Sa akong obserbasyon, lugar mo-ingon unya ang DepEd nga walay bayad ang drug testing, apan duna lang gamay. Gamay nga bayad sa kemikal nga ihalo sa ihi aron masayran kung positibo o negatibo ang usa ka tinungha.

Atong huna-hunaon pag-ayo pila ang ihap karon sa mga tinungha sa tibuok nasud.

Bisan tag-piso lang ang bayad, apan kung imong suma-sumahon mo-abot usab kini og binilyon.

Kini mga panglantaw lamang, apan, kung imong sutaon pag-ayo mahimo kining usa ka sekreto nga paagi sa pagpangawkaw sa gobyerno.

Bisan gani ang usa ka daku nga opisyal sa DepEd ning siyudad wala masayod kung duna ba o walay bayad ang maong lakang, samot na lugar kining ordinaryong katawhan.

Mas maayo tingali unahon ipa-ilawom sa drug testing ang mga opisyal sa gobyerno. Una sa line-up ang first family, dayon ang mga batos niini.

Mosunod usab kining mga polis, lakip na ang miyembro sa Philippine Drug Enforcement Agency (PDEA).

Kamo? Uyon ba mo sa drug testing sa mga tinungha, ipadangat sa 0929-8140-764 or email tawengd@yahoo.com.