Another round of rollback; Big 3 deadma

Alas dos sa hapon kagahapon, Disyembre 11 mipakunhod na usab og P3 sa presyo sa diesel ang pipila ka independent players, kini gilangkoban sa Seaoil Philippines, Eastern Petroleum ug Flying V.
Nunot niini, nadugangan karon ang kalipay nga gibati sa ordinaryong mga drayber ilabina ang pagpasamada lamang ang ilang gisaligan sa inadlaw-adlaw nga pangabuhi.
Gawas sa P3 nga rollback sa diesel, nipakunhod usab sa piso matag litro sa gaas kon kerosene ang nasampit nga mga kompanya.
Si Glenn Yu, presidente sa Seaoil nagkanayon, rason lamang sa nasampit nga rollback ang padayong pagkunhod sa presyo sa lana sa kalibutanhong merkado.
Samtang si Flying V spokesman Joey Cruz, miingon usab nga P3 ang ilang ikunhod sa presyo sa gasolina samtang P1 usab sa krudo.
Sa ingon ani lugar nga sitwasyon, dili malalis nga maglibog gyud ang publiko nganong ang big three nga gilangkoban sa Pilipinas Shell, Chevron Philippines (kanhing Caltex) ug Petron Corporation wala man misubay sa maong lakang.
Another round na pud ba kaha kini sa pagpangilad ngadto sa publiko?
Sa interbyu sa Brigada News ngadto kang Carli Gun, manager sa usa ka Petron Corporation ning siyudad sa Cagayan de Oro, siya mikompirmar nga wala pa silay nadawat nga mando gikan sa ilang labaw sa nasyunal kung mo-abay ba sila sa bag-uhay nga rollback nga gihimo sa tulo ka independent players.
“As of this day wala pa mi advised gikan sa among labaw nga mopatuman og another rollback sa presyo sa among gasolina o gaas, depende kana sa among sales representative”, siya mikanayon.
Well, sa ingon ani lugar nga puntoha imo nang mamatikdan ang hilabihan kadugay kung mopakunhod na gani og presyo sa ilang mga produkto, apan kung mopa-usbaw na gani kini, paspas pa sa kilat.
Di lamang dugay gituki usab sa hawanan sa konseho ning siyudad sa Cagayan de Oro ang unfair kon dili makatarunganon nga pagpatuman og rollback sa tatlo ka dagkung kompanya sa lana.
Imbes nga singko ang angay untang ipatumang rollback, ila pa lugar gidaginot ang P2.50, diin gikasuko pag-ayo sa pipila ka mga kagawad sa dakbayan.
Subay niini, si Councilor Ramon Tabor, chairman sa committee on laws and rules sa konseho mipanday og ordinansa labot sa paghatag og silot niining tulo ka dagkung kompanya sa lana kung masayrang nangilad sa katawhan gumikan sa dili haom nga implementasyon sa rollback.
Usa sa mga silot nga nakalatid sa maong ordinansa ang pagtangtang sa ilang mga lisensya nga mo-operate sa ilang patigayon dinhi sa syudad.
Dihang gipangutana matud pa ang tulo ka independent players nganong mipatuman sila og laing rollback ning panahona, ang ilang tubag, may mga higayong dali ra usab sila mopakunhod sa ilang presyo gumikan finished product na matud pa ang ilang produkto, itandi sa big three nga kinahanglan pang mo-agi sa refinery.