Nazareno gibasol

Nagkadaiyang opinyon, nagkalain-laing panglantaw ang gipaggula karon sa katawhan labot sa paghidangat sa Imahe sa Nazareno gikan sa Quiapo, Manila dinhi sa dakbayan sa Cagayan de Oro niadtong, Enero 6.
Sa mga gihinabi sa Brigada News, pipila ka pamilya kinsa naa sa kasamtangan sa nagkalain-laing evacutation centers mikanayon nga sukad nahidangat ang itum nga Nazareno sa dakbayan nagsugod usab ang maong katalagman.
Nunot sa maong reaksyon, mipasibaw usab og pagsuporta sa maong imahe ang pipila ka katawhan.
Usa si Teresita, 45, sa Barangay Bulua, ang nakahigayon pagsulti nga dili angay ibasol ngadto sa Imahe ang gihimong pagpasagad sa kinaiyahan sa katawhan.
Matud niya, isip deboto sa Nazareno, dili angay hugaw-hugawan ang pagka-maayo niini, sanglit daghan matud pa sa mga siyudad sa rehiyon ang gihapak sa maong katalagman.
Ang paghidangat sumala pa ni Nazareno sa siyudad, simbolo lamang nga angay nang magbag-o ang katawhan.
Apan, hugtanon usab kining gisupak ni Jun Inanyog sa Barangay Igpit, Opol, Misamis Oriental, giilang deboto sa simbahang katoliko.
Matud niya, sulod sa dugay nang panahon nga iyang gibarugan ang iyang relihiyon isip katoliko wala siyay nakitang igong rason nga angay tuohan ang imahe sa Nazareno, sanglit wala matud pa kini niya nakita nga nalatid sa balaang kasulatan.
Kahibaloan, sa miaging semana dihang unang gibaha ang dakbayan, Enero 3, gibutyag ni Cagayan de Oro city councilor Ceasar Ian Acenas, chairman sa committee on environment sa konseho nga kung duna man lugar basulon sa maong kalamidad walay lain kundi ang katawhan mismo.
Gipunting sa opisyal ang padayong land conversion nga gikonsidera niining usa sa hinungda sa pagka-upaw sa kalasangan.
Ang pagkadaut sa kinaiyahan ang maoy usa sa mga nakatampo sa bag-uhay lamang nasinating kalit nga pagbaha sa dakbayan sa Cagayan de Oro, lalawigan sa Misamis Oriental ug kasikbit nga mga siyudad sama sa Iligan.
Isip chairman sa maong komitiba, gihingusgan sa opisyal nga dili niya suportahan ang unsa mang lakang alang sa katuyuan sa land conversion.
Ang land conversion, usa ka lakang sa pagbalhin sa forest land kon mga kakahuyan ngadto sa agricultural land kon kaumahan.
Sa akong tan-aw, kinahanglan dunay mga ‘preventive measures’ nga himuon ang Department of Environment and Natural Resources (DENR), lugar og ilang ipatuman ang unsa mang programa niini.
Si DENR 10 Regional Executive Director Maximo O. Dichoso, sa interbyu sa radyo, mikanayon nga hugtanong gidili sa DENR ang land conversion.
Wala matud pa kini sa balaod sa nasampit nga ahensya, hayan, posibleng dunay natigayong conversion sa yuta.
Sa ingon ani nga punto, atong nasayran nga supak kaayo ang DENR kung hisgotan ang land conversion, hayan, kinsa man ang angay mabasol kung katap sa gihapon kining matang sa trabaho?
Dili na unta angay hulaton pa, nga hasta ang imahe sa Nazareno mabasol na hinuon sa katawhan tungod niining katalagman.
Dili usab nimo mapugngan kining gipasibaw karon nga mulo sa katawhan tungod nag-agad usab sila sa ilang tinuohan.
Kung buot huna-hunaon wala gayu’y si bisan kinsa makapunting sa tinuod nga relihiyon nga makaluwas. Kung nagbinsola man tungod sa maong santos, unsa man ang angay buhaton?
Ang pangutana, asa man diay ang imahe nganong dili man mahimong ibalik sa dapit nga gigikanan? Sa ingon ani nga pangutana, sigurado masuko ang pipila.
Ato lang huna-hunaon nga dunay mga panghitabo sa palibot nga bisan ang siyensya maglisod mopasabot sa katawhan.
Ang akong punto mao kini, nganong dili nato igahin ang atong kalantip sa pangutok kung unsa atong matabang sa sosyodad aron malikayan ang katalagman.
Ang problema mao kini, bisan gani sa simple lang nga paagi sama sa paglabay sa hustong kalabayanan sa basura dili mahimo ni Juan dela Cruz.
Kung mahitabo na gani ang katalagman basulon dayon ang kagamhanan.
Karon kay bag-uhay lamang nahuman ang kapiyestahan ni Nazareno, basulon na usab ang Santos.
Unsa man gyud? Maayo tingali sugdan nalang nato ang kabag-uhan sa atong pamilya.
Karong 2009, kay gihinloan man sa baha ang atong dakbayan, well ipa-anod sab nato ang atong hiwi nga mga binuhatan uban sa baha aron nga ‘We will leave happily ever after.’
Sa inyong mga komento ipadangat sa 0929-8140-764 email sa tawengd@yahoo.com