Normal lamang matud pa alang kang Cagayan de Oro City Police Director P/Sr. Supt. Isagani Genabe, Jr. nga ipa-ilawom ang iyang performance sa re-evaluation.

Kini human gisaway sa pipila ka mga magbabalaod sa dakbayan ang iyang kahimoan sa pagmintinar sa kahapsay ug kalinaw sa siyudad.

“Well, it’s normal, even in the Philippine National Police officers meron talagang evaluation o re-evaluation,” matud pa ni Genabe sa interbyu sa Brigada News kaniya.

Andam matud pa siyang ipa-ilawom sa re-evaluation ang iyang performance isip city director sa Cagayan de Oro City Police Office (COCPO).

Mahinumduman niadtong miaging tuig 2008, walay puas nga gibatikos si Genabe sa iyang performance gumikan sa pakyas matud pa nga pagpatuman niini og hugot nga seguridad sa dakbayan nunot sa sunod-sunod nga tulis nga natigayon.

Gilakip sa nasampit nga isyu ang wala matud pay aksyon nga gihimo ni Genabe labot sa pagpatay sa usa ka sa giingong quack doctor, diin ang responsable niini mao ang pipila ka mga sakop sa Cagayan de Oro Drug Enforcement Unit (CDEU).

Niadtong miaging tuig, gihinabi usab sa Brigada News si Genabe labot sa isyu nga gibato kaniya nga dili na kini mahimo molungtad sa serbisyo sunod tuig. Ang iyang tubag, “Well, I will leave peacefully.”

Una niini gihingusgan Cagayan de Oro City Councilor Ian Mark Nacaya atol sa ilang committee hearing sa konseho nga angay gayud sipaon sa pwesto si Genabe tungod sa dili niini maayong pagdumala sa siyudad.

Nasayran subli na usab gibatikos sa mga magbabalaod si Genabe kini tungod sa sunod-sunod nga kaso sa labni ug tulis diin duna pay nakabsan sa kinabuhi ug dunay naangol sa mga biktima.

Gidugang ni Nacaya, isip chairman sa Committee on Police, Fire and Public Safety sa konseho iyang ipadangat ngadto sa buhatan ni Mayor Constantino Jaraula ang ilang namugnang resolusyon labot sa pagpahibalo sa liderato ni Genabe.