Human sa turn-over of command ceremony sa Maharlika Headquarters niadtong Miyerkules, Pebrero 25, gitigom ni Armilla ang tanang mga station commanders ug ubang opisyales sa COCPO.

“Palihog lang kinsa kaninyo ang gapayuhot og drogas, isulti naku kay atong tabangan,” matud niya.

Isip usa ka polis nga maoy law enforcer sa katilingban, gihingusgan sa opisyal nga dili maayong sumbanan sa katawhan ang paggamitan og gidiling drogas tungod maka-apektar kini sa panghuna-huna sa tawo.

“Dili nato hugaw-hugawan pag-ayo ang COCPO, palihog lang. Kinsa ang ga-drogas kay atong tabangan,” sulit sa opisyal.

Gitino sa opisyal nga ang drogas maoy usa sa mga nakatampo sa paghimo og krimen. Hayan dili kini angay himuon sa mga ginsakpan sa COCPO.

Una niini, pormal nang nilingkod isip officer in charge sa COCPO niadtong Miyerkules si Armilla isip hulip sa kontrobersyal nga city director Senior Supt. Isagani Genabe, Jr.

Si Genabe miluwat na sa COCPO ug gikatakdang hatagan og laing responsibilidad ngadto sa camp crame isip opisyal sa plans and operation division.

“I will leave in Cagayan de Oro city and going back to the place where I belong,” si Genabe nibutyag sa iyang mensahe.

Kahinumdoman walay puas ang pagbatikos sa katawhan sa performance ni Genabe sa dakbayan.

Atol sa iyang pagpamolong sa turn over of command ceremony siya midepensa nga wala lang nasayran pag-ayo sa publiko ang iyang mga accomplishment.
“I will say goodbye, hindi ibig sabihin dahil akoy binatikos but it is another promotion for me as a policeman,” matud ni Genabe sa interbyu sa Brigada News.

Hinuon sa bahin sab ni Armilla siya mi-apela sa publiko nga hatagan usa siya og usa ka bulan alang sa paghan-ay sa mga programa sa COCPO.

“Kung unsay mga maayo ni Col. Genabe atong ipadayon,” matud pa sa opisyal.
Nasayran si Armilla kanhing police director sa lalawigan sa Bukidnon sa pipila ka tuig. Fred Dellava