Usa ka kalabira sa ulo sa tawo ang nakoy-koyan sa pipila ka mga residente kinsa mipahigayon og operasyon hinlo matag Dominggo sa Barangay 36, siyudad sa Cagayan de Oro.

Nakit-an ang kalabira sa basurahan nga gilabayan og mga hugaw mga alas 8:00 sa buntag, Pebrero 1.

Sa pakighinabi sa Brigada News kang Police Officer 3 Diolando, imbestigador sa Cogon Police Station iyang gikompirmar nga usa ka kalabira sa ulo sa tawo ang napalgan sa mga basurero.

Hinuon iyang gipasabot nga walay siyay igong kahibalo sa pag-ila kung unsa ang kinatawo sa maong kalabira. Dili niini matumbok kung lalaki ba o babae sanglit nagkamolo pa ang mga otoridad sa Scene of the Crime Operatives (SOCO) sa pag-otopsiya sa patayng lawas.

Gidugang sa opisyal nga dihang ilang girespondihan ang maong dapit, iyang nasuta nga posibleng dunay igo tinigbasan ang nasampit nga kalabira tungod natunga ang bagul-bagul niini.

Kini matud pa ang naka-aghat sa mga residente sa pagdangop ngadto sa kapolisan ug naka-intriga matud pa kanila.

Sigun ni Diolando usa nagpangalang Allan Barillo, hepe sa mga tanod sa nasampit nga barangay ang maoy mitaho ngadto kanila.

Napalgan ang kalabira sa dapit nga dili ra layo sa gikahimutangan sa Maria Reyna Hospital sa J.R. Borja Extension, siyudad sa Cagayan de Oro.

Hinuon hangtod sa pagsulat ning balita wala pa masuta kung unsa ang kinatawo napalgang kalabira.

Matud sa report duna pay nahibiling mga ngipon ang nasampit nga kalabira ug kini ang padayon karong gitun-an pag-ayo sa SOCO.