Patyon ang adiktos: ‘Yes why not’

“Yes why not,” kini ang tipik sa pamahayag ni Atty. Ombra Gandamra, Regional Director sa Office of Muslim Affairs (OMA) dinhi sa rehiyon 10 labot sa subling pagbalik sa silot kamatayon sa tigpayuhot og gidiling drogas ug drug pusher.

Sa interbyu sa Brigada News ngadto kaniya siya miingon nga angayan lang silotan og kamatayon ang kinsa mang mapamatud-ang sad-an.

Sanglit dugay nang gikonsidera nga usa ka heinous crime kon linuog nga paagi ang pagpayuhot ug pagbaligya sa gidiling drogas.

Gipasabot sa opisyal nga nalatid sa Koran, ang balaang kasolatan sa Islam nga mahimong patyon ang kinsa mang mapamatud-ang sad-an kon mihimo og dautan sa iyang isig-katawo.

Hayan, wala matud pa siya pagsupak nga bitayon ang mapamatud-ang adik ug gabaligya og gidiling drogas.

Ang gidiling drogas matud pa ang sagad nakatampo sa ubay-ubay nga mga krimen nga nahitabo sa sosyodad.

Kung dili matud pa kini masumpo, dili usab makab-ot sa katawhang Pilipinhon ang tinuorayng kalinaw.

Nasayran nga giduso gilayon sa pipila ka mga magbabalaod sa kamarabaha ang pagbuhi sa death penalty batok sa drug user ug pusher.

Kahibaloan nunot sa kontrobersyal nga ‘Alabang Boys’ subling giduso ni Senador Juan Miguel Zubiri ang death penalty law.

Gihingusgan pa ni Zubiri nga niadtong Mayo 2008 pa niya gipasang-at ang maong sugyot balaudnon, apan wala matud pa kini nilihok sa Senado hangtod karon.