Tulo ka mga anggulo ang padayong nga gitun-an karon sa mga otoridad sa pagluthang patay kang SPO1 Ashly Villarico kinsa sakop sa Lumbia Police Station ning siyudad sa Cagayan de Oro, Enero 27, Martes.

Sa report nga nahipos sa Brigada News, gibutyag ni PO2 Noel Perpetua, imbestigador sa Agora Police Station usa ka nakabonet nga suspek ang mipusil sa biktima samtang naa kini sulod sa Cloud 9 club nga nahimutang sa Barangay Lapasan ning siyudad.

Kalit matud pang gipa-arakan ang biktima dihang misulod kini sa nasampit nga bar mga alas 8:00 sa gabii.

Sumala pa usab ni Police Officer 1 Abrizer, duty officer sa nasampit nga presinto sa interbyu sa Brigada News, usa ka nagpakabanang lungsuranon ang unang midangop kanila labot sa natigayong pagpamusil sa nasampit nga bar.

Gilayon usab kining girespondihan sa mga sakop sa Agora PNP ug gisuta ang maong insidente.

Nakuha matud pa sa crime scene ang unom ka mga basiyo sa kalibre 45 nga pistola, diin gituohan nga maoy gigamit sa pagpusil sa nasampit nga polis.

Human sa panghitabo gidala sa Northern Mindanao Medical Center (NMMC) ang biktima, apan paghidangat sa alas 9:30 sa gabii gideklara kini sa attending physician nga patay na.

Subay sa pagsi-unang imbestigasyon gilayong misibat ang suspek lulan sa giingong ‘get-away’ vehicle. Duna matud pay pungos nga panyo ang suspek dihang natigayon ang pagpamusil.

Gibutyag sa mga otoridad nga nakahi-agom og unom ka mga igo sa pistola ang lawas sa biktima, diin gitudlong hinungdan sa iyang hinanaling kamatayon.

Gidugang pa usab ni Abrizer nikuha na og blood sample ang mga otoridad aron sutaon kung may kalabotan sa droga ang pagpusil patay sa nahisgotang polis.

Hangtod sa pagsulat ning balita nagkamolo pa ang mga otoridad sa imbestigasyon aron sutaon ang motibo sa krimen.

Samtang hustisya karon ang gipasibaw sa kabanay sa gipatay nga polis di pa lamang dugay.