Gibalhog na sa Lumbia City Jail ning siyudad sa Cagayan de Oro ang usa ka tulisan kinsa bag-uhay lamang nasikop sa mga sakop sa Puerto Police Station sa pagpanguna ni Police Chief Inspector Laurence Mauricio.

Si PO3 Dennis Cerilla, duty officer sa Puerto PNP miila sa dinakpan nga usa ka Eugene Elarmo alyas Jun, hingkod ang edad, ulitawo sa Barangay Poblacion, Tambacan, Alubijid, Misamis Oriental.

Nasayran nga niadto pang miaging semana sa adlawng Sabado, Enero 31 gisikop sa hiniusang pwersa sa maong presinto ang suspek.

Una niini, gibutyag ni Cerilla nga usa ka impormante ang midangop ngadto sa ilang istasyon labot sa gikahimutangan sa suspek.

Gilayon matud pa kining girespondihan sa kapolisan mga alas 6:30 sa buntag hinungdan nga nasikop ang suspek samtang naa sulod sa iyang gipuy-an.

Gikuha gikan sa iyang posesyon ang kalibre 38 pistola. Gitudlo si Elarmo nga maoy mitulis sa usa sa mga biktima nga pagpakitabang usab sa ilang presinto di pa lamang dugay.