Misis bugha sa selosong bana

(Bana mihikog sab)
Bugha ug nagbuy-od nga wala nay kinabuhi ang kanhi gisa-arang higugmaon nga misis sa usa ka selosong bana sa Tubigan, Initao Misamis Oriental.

Sa report nga nahipos sa Brigada News sa Initao Police Station giila ang napatay nga asawa nga usa ka Charry Cañete, 22, minyo ngadto sa suspek nga iyang bana kinsa giilang usa ka Rey Cañete, 26 anyos sa samang dapit.

Sa inisyal nga imbestigasyon sa mga otoridad gitudlong motibo sa krimen ang tumang pagpa-nelos sa suspek ngadto sa iyang asawa.

Sigun sa pipila ka mga residente sa maong dapit, halos matag adlaw na matud pang magpunay og away ang nasampit nga magtiayon.

Hilabihan matud pa ka seloso ang suspetsadong bana hinungdan nga iyang gikulata ang iyang asawa.

Iya kining gidabo-dabohan og sumbag hangtod nga nakuyapan ug iyang na lamang matud pa kining gitiwas pinaagi sa pagtigbas sa li-og sa mahait nga pinuti.
Sigun sa report, dihang nakit-an sa nasampit nga bana nga patay na ang iyang misis, mikuha kini og kutsilyo og dayon misulay paghikog.

Giluba matud pa sa nasampit nga bana ang iyang kaugalingon hinungdan nakahi-agom kini og ubay-ubay nga mga samad sa nagkadaiyang parte sa iyang lawas.

Nakahi-agom kini og tulo ka mga samad dinunggaban ug nagpabilin pa sa Northern Mindanao Medical Center (NMMC) ning siyudad sa Cagayan de Oro.

Hinuon, hangtod sa pagsulat ning balita nagkamolo pa ang mga otoridad paghipos sa motibo sa kamatayon sa nasampit nga misis.