Rapist, killer sa 8 anyos gikonsensya mitahan

Mitahan sa iyang kaugalingon ang gitumbok nga suspek sa paglugos ug nagpatay sa 8-anyos nga batang babaye kinsa napalgan na lamang nga nagbuy-od ug stage of decomposition na ang patayng lawas niini sulod sa gi-abandonang pansayan sa merkado Publiko sa Agora, Lapasan, siyudad sa Cagayan de Oro, Enero 29, Huwebes.

Sa gihimong pagpanubay sa maong kaso gibutyag ni SPO3 Abner Adajar, chief investigator sa maong kaso nga usa ka Rejie Tudtud, 18, ulitawo ang gitudlong suspek sa krimen.

Si Adajar miingon, ayha mitahan ang suspek nadawat sa mga operatiba ang impormasyon nga mikagiw kini sa usa ka dapit sa lungsod sa Alubijid, Misamis Oriental.
Usa matud pa kining girespondihan sa mga otoridad dunay silay nadawat nga taho gikan sa nagpakabanang sibilyan sa gikahimutangan sa suspek.

Matud sa report tua sa San Lazaro, Barangay Lapasan ning siyudad ang suspek. Hayan gilayon kining gisuta sa mga otoridad.

Paghidangat sa mga operatiba sa maong dapit, yanong mitahan lamang sa iyang kaugalingon ang suspek. Wala usab kini nakuhaan og unsa mang mahait nga hinagiban.

Matud pa ni Adajar gikonsensya ang suspek sa linuog nga pagpatay sa biktima human gipanamastamasan.

Nanimuyo ang suspek kilid lamang sa nasampit nga merkado. Patay na matud pa ang inahan sa suspek samtang gi-amoma lamang kini sa iyang ama-ama.

Sa edad nga kinsse anyos gibalhog na sa prisohan ang suspek tungod nasapon kining ga-simhot og rugby.

Dugang pa ni Adajar kanonay nalambigit ang pangalan sa suspek sa ubay-ubay nga petty crimes sa maong dapit.

Halos regular na matud pa kining priso ngadto sa ilang presinto gumikan nagbalik-balik lamang kining ibalhog tungod sa iyang dautang hinimoan.

Gidugang ni Adajar nunot sa maong panghitabo gilayong nimugna og task force Basahan ang Cagayan de Oro City Police Office (COCPO) diin gipangunahan sa Agora PNP.

Si Tudtud ang usa sa gitudlong suspek sa linuog nga pagpatay sa 8-anyos nga batang babaye nga giilang usa ka Rosayve Basahan, tinun-an sa kinder 1 sa Mobile School nga nahimutang daplin sa Agora Public Market.

Sa report nga nahipos sa Brigada News nasayran nga una nang gikompirmar sa Scene of the Crime Operatives (SOCO) nga gilugos ang biktima ayha giluba sa siyam ka higayon hangtod nakabasan sa kinabuhi.

Human sa panghitabo gibiyaan lamang ang biktima sulod sa pansayan, rason nga nabalaka pag-ayo ang mga ginikanan ug nagpatala sa kapolisan.

Dumdoman nga human napalgan ang patayng lawas sa biktima gilubong gilayon kini ngadto sa Bolonsiri Public Cemetery sa Barangay Nazareth ning siyudad.