(DepEd RIO mi-uyon) Sa drug test, titser una sa linya

(DepEd RIO mi-uyon)
Sa drug test, titser una sa linya

Human miggula ang kamandoan gikan ni Presidente Gloria Macapagal-Arroyo labot sa pagpatuman og random drug testing ngadto sa mga tinungha sa sekondarya sa tanang tunghaan sa nasud, gi-uyonan usab ni Medarda Galarita, Regional Information Officer sa Department of Education (DepEd) rehiyon 10 nga ipa-ilawom sa drug testing ang mga magtutudlo.

Isip magtutudlo, gipasabot ni Galarita nga kinahanglan ang maayong ehemplo ngadto sa mga tinungha.

Hinuon, gitino sa opisyal nga mag-depende lamang usab kana sa ipaggula nga mga giya diin naglangkob sa nasampit nga kamandoan.

Sa laktod pabor ang nasampit nga opisyal nga ipa-ilawom usab sa drug testing ang tanang mga magtutudlo sa nasud.

“So far sa among case, ayha ka makasulod sa maong profession isip magtutudlo, kabahin na sa among rekositos ang drug testing,” siya miingon.

Giklaro usab niini nga dili malikayan nga dunay pipila ka mga magtutudlo nga mi-serbisyo na sa tunghaan dihang mogamit og gidiling droga.

Kahibaloan, una nang gibutyag ni Galarita sa interbyu kaniya sa Brigada News nga sa pagkakaron wala pa nila madawat ang memorandum gikan ni Education Secretary Jesli Lapus kung kunus-a i-implementar ang random drug testing sa mga tinungha.

Ang ila lamang matud pang nadawat bag-uhay lamang mao ang DedEd memorandum nga ipa-ilawom sa pagbansay ang nagkadaiyang mga opisyales kinsa mangulo sa nasampit nga lakang.

Sigun sa iyang pagkasayod, si Galarita miingon nga posibleng sunod semana sa petsa 29 o 30 ning bulan sa Enero ipahigayon ang pagbansay ngadto sa Tagaytay.

Kini gilangkoban matud niya sa mga personahe sama sa DepEd medical doctors, chiefs sa education supervisors, focal persons ug uban pang opisyales nga dunay tahas sa pagpatuman sa maong lakang dinhi sa rehiyon 10.