Janitor sa police headquarter giluba sa grupo

Usa ka janitor sa Maharlika Headquarters sa Cagayan de Oro City Police Office (COCPO) ang nagpakitabang ngadto sa mga otoridad human gitabangan og kulata sa pito ka armadong mga kalalakin-an samtang nagbaklay sa Mabulay Subdivision, Barangay 27 ning siyudad.

Giila ang biktima nga usa ka Oliver Caritan, 27, ulitawo, janitor sa Maharlika Police Head Quarter ning siyudad.

Si SPO3 Bolanio, duty officer sa Cogon Police Station miingon sa Brigada News nga natigayon ang insidente mga alas 8:00 sa gabii dihang namisita ang biktima ngadto sa iyang higala sa nasampit nga barangay.

Dihang pa-uli na sa iyang gipuy-an, kalit matud pang gi-atngan ang biktima sa grupo kinsa armado sa mahait nga mga butang.

Gisaysay sa biktima nga kalit lamang siyang gituok sa usa sa mga suspek kinsa giilang usa ka Ruel Lagumbay, Barangay Police sa Barangay 27.

Wala matud pa makontento ang suspek gibunalan pa siya ini og puthaw hinungdan sa iyang pagkahagba.

Gawas sa unang suspek nga mikulata kaniya misunod gilayon ang mga kaubanan niini kinsa milabay og walay unod nga botelya sa ilimnong makahubog.

Gidugang ni Bolanio gisulayan pa pagluba ang biktima sa usa sa mga suspek, apan iya kining napugngan.

Gisangag matud pa sa biktima ang kutsilyo hinungdan nga nasamdan ang iyang tudlo.

Sa inisyal nga imbestigasyon sa mga otoridad gituohan nga pangparegla lamang ang motibo sa insidente.

Apan si Bolanio mikanayon, padayon pa usab kini karong giimbestigahan pag-ayo sa Cogon Police Station.