Mi-apela karon ang Department of Education (DepEd) ngadto sa mga kidnaper alang sa luwas nga pagbuhi sa tulo ka mga magtutudlo sa publikong tunghaan sa Zamboanga.

Matud pa ni Medarda Galarita, DepEd regional information officer sa rehiyon 10 sa pakighinabi sa Brigada News, iyang gikasubo pag-ayo ang natigayong pagkidnap sa naasoyng mga magtutudlo.

Usa matud pa kini ka linuog nga paagi ug pagpanghasi sa mga magtutudlo kinsa miserbisyo alang sa pagpalambo sa edukasyon sa publiko.

Nanghinaot na lamang ang opisyal nga hatagan og igong pagtagad sa nasudnong gobyerno ang maong panghitabo.

Sa gipagawas nga pahayag ni Education Secretary Jesli Lapus, iya nang gimandoan bag-uhay lamang si Undersecretary for Regional Operations Ramon Bacani ug local DepEd nga makig-alayon sa kagamhanang lokal ug sa mga otoridad.

Gimandoan usab ni Lapus ang nasampit nga mga opisyales nga tabangan ang kabanay sa mga biktima.

Kahibaloan tulo ka mga magtutudlo sa publikong tunghaan ang gituohang gikidnap sa upat ka wala mailhing mga armadong kalalakin-an sa kinsa lulan sa motorized pump boat sa Barangay Landan Gua sa Zamboanga City.

Matud sa report giila ang mga dinakpan nga sila si Quizon G. Freires, ulitawo, 28; Jannette C. Delos Reyes, dalaga, 29; ug Raphael L. Mayonado, ulitawo, 24-anyos.