Hubog nadakin-as dyotay ma-todas

Nahagbong sa habog nga hagdanan sa merkado publiko sa Cogon ning siyudad sa Cagayan de Oro ang usa ka hubog nga lalaki hinungdan gidali gilayon kini pagdala sa balay tambalanan.

Matud sa report ang biktima giilang usa ka Roger Barsobia, 46, minyo sa Barangay Balulang ning syudad.

Nakahiagom og nagkadaiyang bun-og sa iyang lawas ang biktima ug nagpabilin pa sa Northern Mindanao Medical Center (NMMC).

Gipa-ilawom usab sa CT-scan ang nasampit nga biktima aron sutaon kung na-apektuhan ba ang ulo niini.
Gawas sa iyang ulo nabalian usab og bukog ang sa iyang abaga ug hawak ang biktima.

Gisaysay pa sa pipila ka mga naka-kita sa maong panghitabo nga hilabihan kahubog ang biktima dihang nanaug kini gikan sa ikatulong andana.

Sumala pa nakadakin-as kini hinungdan nga yano lamang kining nahagbong sa yuta.