Nag-date daplin sa taytay gitulis (2 tanod miresponde gipusil sa 2 wa ilhi)

Giingong nag-date ang mga biktima daplin sa taytay sa national highway sa Barangay Nazareth ning siyudad sa Cagayan de Oro dihang gitulis sa duha ka wala mailhing suspetsado.

Subay sa pasi-unang imbestigasyon sa mga otoridad, si Police Officer 2 Sagon, imbestigador sa Macasandig Police Station miila sa mga biktima nga sila si Jeremiah Cabrian, Chebert Canalis, Michael Reandro, Vanessa Araduque ug Francis Tero, kinsa pulos hingkod ang edad sa maong barangay.
Sumala pa ni SPO1 Dumanig sa interbyu sa Brigada News, usa ka tawag ang ilang nadawat labot sa natigayong tulis gikan sa pamilyang Zabari, residente sa nahisgotang barangay.

Matud pa sa pamilyang Zabari nagpakitabang kanila ang usa sa mga biktima sa pagpanulis, rason nga ila gilayong gidangop kini sa kapolisan.

Girespondihan sa mga ginsakpan sa Macasandig PNP kinsa gilangkoban nilang SPO4 Ellison, PO3 Daniar ug PO3 Javierto ang nasampit nga dapit.

Atol sa ilang pag-responde, gi-asoy sa mga biktima nga lulan sa XRM motorsiklo ang duha ka mga suspek.

Pulos armado matud pa ang duha og kalibre 45 pistola. Ang usa maoy nagmaneho, samtang ang usa maoy gun man.

Matud sa report ayha mahidangat ang mga polis, duha ka mga barangay tanod ang miresponde sa nasampit nga dapit atol sa ilang pagpatrolya.

Ilang gitabangan ang mga biktima ug dihang ila na untang sikopon ang mga suspek, kalit lamang silang gipusil.

Dunay igo sa tuong batiis ang tanod nga giilang usa ka Elmer Nautan, 43, samtang si Dondon ELo, 31, gipusil usab sa likod nga bahin.

Gidala gilayon ang mga biktima sa Polymedic Medical Hospital ug kasamtangan pang nagpa-alim.

Human sa panghitabo paspas matud pang misibat ang mga suspek bitbit ang ubay-ubay nga mga mahalong cell phones gikan sa mga batan-on.

Hangtod sa pagsulat ning balita nagkamolo pa ang mga otoridad pagpangita sa mga suspetsado.