Usbaw-presyo sa gasolina lauman na

Giangkon karon ni Mr. Carle Gan, usa sa mga tigdumala sa Petron Corporation ning siyudad sa Cagayan de Oro nga posibleng mosaka pa ang presyo sa lana sa kalibutanhong merkado.

Nunot niini lauman matud pa sa katawhan ang pag-usbaw sa presyo sa produktong petrolyo.
Sa pakighinabi sa Brigada News, iyang gipasabot nga sukad sa miaging adlaw ilang gipatuman ang pag-usbaw sa presyo sa ilang produktong gasolina.

Matud niya ang diesel mobalor na og P 28.23; XCS P 30.95; Unleaded P 30.45; Blaze P34.30, samtang ang Kerosene kon gaas mobalor og P 36.53.

Hinuon ang presyo sa krudo kon diesel ang maoy gikonhuran og 50 sentimos matag litro tungod barato matud pa ang presyo niini sa world market.

Mahinomduman una nang gibutyag sa tulo ka mga dagkong kompanya sama sa Pilipinas Shell, Chevron ug Petron Corporation nga dili pa mahuman ang serye sa oil price hike ning tuiga tungod nag-agad lamang usab sila sa kahimtang sa kalibutanhing merkado.

Una niini, 75 sentimos ang gi-usbaw sa presyo sa gasolina samtang piso usab sa E-10 ug mi-rollback sa 50 sentimos ang presyo sa diesel ug kerosene.

Matud pa ni Bobby Kanapi, tigpamaba sa Pilipinas Shell lauman sa katawhan ang lain na usab nga 50 sentimos price hike ning adlawa tungod sa padayong pagsaka sa presyo sa produktong petrolyo sa world market.