Sundalo gitagud-tagod

Naputos sa ubay-ubay nga mga samad tinigbasan ang biktima nga usa ka miyembro sa Civilian Armed Forces Geographical Unit (CAFGU) gikan sa wala mailhing suspetsado.

Ang mga otoridad miila sa biktima nga usa ka Winchard Velasco, 27, minyo, lumad nga taga sa Tandag, Surigao del Sur.

Hisayran nga una nang nagpa-alim ang biktima ngadto sa ospital nga nahimutang sa nasampit nga lalawigan. Tungod sa grabe ang kahimtang niini gidala na lamang kini pasado alas 6 sa buntag, Biyernes sa Northern Mindanao Medical Center (NMMC), Cagayan de Oro.

Asoy pa sa misis kinsa giilang si Letecia sa interbyu sa Brigada News nga igo lamang nagbugha og kahoy ang biktima sa ilang nataran dihang natigayon ang pagpanigbas.

Wala nakamatikod ang biktima, hayan misibat gilayon ang suspetsado bitbit ang mahait nga pinuti nga iyang gigamit sa pagpanigbas.

Gidudang pa ni Letecia buot untang tipion sa suspek ang biktima, apan maayo na lamang kay nakalingkawas kini.

Subay sa pasi-unang imbestigasyon sa mga otoridad miggula nga posibleng may kalabotan sa trabaho ang krimen.
Nasayran nga usa ka aktibong miyembro sa Cafgu ang biktima nga nakabase sa 23rd Division sa Tandag, Surigao del Sur.