Mader gi-dinamita sa anak

Dyotay lang mapatay ang usa ka inahan dihang nabuthan og dinamita nga gilabay kaniya sa iyang uliton nga anak.

Ang mga otoridad miila sa biktima nga usa ka Janeth Empenado, hingkod ang edad, minyo sa Barangay Liberty, Laguindingan, Misamis Oriental.

Sa report nga nahipos sa Brigada News, gi-asoy sa kabanay sa biktima nga igo lamang kining nanghinlo sa ngadto sa ilang kumidor dihang nahitabo ang insidente pasado alas dies sa buntag, Biyernes.

Sumala pa sa biktima wala niini namatikdan nga giduwaan sa iyang mga anak ang usa ka nitroglycerin-based explosive o mas ilado nga dinamita.

Nunot sa paghinugyaw sa mga bata, kalit lamang matud pang gi-itsa ang nasampit nga butang ngadto sa ilang inahan hinungdan nga nibusikad kini.

Ayha nibuto ang dinamita nagdilaab pa kini ngadto sa ilang abuhan ug dihang nibuto na-igo sa splinter ang nasampit nga inahan.

Nakahi-agom og ubay-ubay nga mga samad ang biktima ug gilayong gidala sa Northern Mindanao Medical Center (NMMC) kinsa kasamtangan pang nagpa-alim.

Nasayran nakit-an sa mga bata ang usa ka lusok sa dinamita ngadto sa bag-ong gitukod nga international airport sa nasampit nga lungsod.