Bana ‘sakit’ kung maghigugma

Human makigbuwag ang biktima ngadto sa iyang bana, nangayo matud pa og bisan gamay nga hinabang nga asawa ngadto sa lalaki, apan inay salapi ang ihatag, ubay-ubay nga mga bun-og naman hinuon ang naangkon sa biktima.

Si SPO2 Julio Catayoc, duty officer sa Macabalan Police Station miila sa biktima nga usa ka Leny Seldo, 30, minyo sa Piaping Itum, Barangay Macabalan, siyudad sa Cagayan de Oro.

Sigun ni Catayoc, nagkadugo pa ang pipila ka parte sa lawas sa biktima dihang midangop kini sa presinto.

Gisaysay niini nga gidabo-dabohan siya og kulata sa iyang bana kinsa giilang usa ka Arlan Seldo, 36, minyo sa samang dapit.

Matud pa sa babaye lango sa ilimnong makahubog ang iyang bana dihang gikulata siya niini.

Sigun niya, igo lamang siyang nangayo og bisan gamay nga kantidad sa salapi, apan wala matud pay ikahatag ang iyang bana ug napungot pa gyud kini ngadto kaniya.

Nunot sa maong panghitabo, kalit gibira-bira ang buhok sa biktima, dayon gituok hinungdan maglisod kini og ginhawa.

Saysay pa ni Leny wala siyay nakitang igong rason sa kalit nga pagpangulata kaniya sa iyang bana, hinungdan midangop kini sa kapolisan ug nagpakitabang.
Mga alas 9:30 sa gabii, Biyernes, gi-asoy sa biktima ngadto sa mga otoridad nga igo lamang siyang nangayo og hinabang alang sa ilang mga anak, apan, nasuko pag-ayo ang suspek.

Human sa panghitabo gilayong miresponde ang mga sakop sa nasampit nga presinto ug gisikop ang hubog nga suspek.

Hangtod sa pagsulat ning balita, pabiling nagtingkagol sa selda ang suspek samtang gihikay ang pormal nga pagpasaka og kaso batok kaniya.