‘Tsiksboy’ giluba

Nagkaguliyang ang mga babaye sa usa ka balay kahilayan dihang kalit giluba ang usa sa ilang sa ‘tsiksboy’ nga kostumer.
Matud sa report natigayon ang insidente mga alas 3:20 sa kadlawon, Biyernes sulod sa Coco Bar nga nahimutang sa Barangay Puerto, siyudad sa Cagayan de Oro.

Nunot niini gilayong midangop sa kapolisan ang tigdumala sa nasampit nga bar.

Sa inisyal nga imbestigasyon sa mga otoridad giila ang biktima nga usa ka Roel Gadrenab, 25, ulitawo sa Lagonglong, Misamis Oriental.

Usa ka wala mailhing kostumer ang miluba sa biktima, kini subay usab sa pamahayag sa pipila ka mga waitress nga tua sa maong dapit.

Human sa pagpangluba giingong kalit lamang misibat ang suspetsado sa wala matinong direksyon.

Tungod sa grabeng samag nga naangkon sa biktima, gidala kini sa balay tambalanan.

Sa unang pagpahiling niini gibutyag sa mga mananambal nga dunay samad sa dughan ug bukton ang biktima.

Gi-asoy pa sa mga babaye nga posibleng na-ulit ang suspek sa pagka ‘tsiksboy’ sa biktima dihang gikagubtan usab kini sa mga babaye.

Mihimo na usab og dugang pagpanubay ang mga otoridad bahin sa maong kaso.