Maldito gitigbas sa seloso

Ang pagka ‘maldito’ sa biktima ang hinungdan nganong gitigbas kini sa makadaghang higayon sa giingong seloso nga suspetsado samtang naa sulod sa ilang panimalay di pa lamang dugay.

Matud sa report ang biktima giilang usa ka Jonard Sartin, 24, ulitawo sa Gango, Libona, Bukidnon.

Samtang ang suspetsado giila lamang sa alyas nga Randy, hingkod ang edad, higala ra usab sa biktima sa nasampit nga dapit.

Subay sa nakutlo nga impormasyon sa Brigada News gikan sa kauban sa biktima dihang natigayon ang insidente, gi-asoy ni alyas Jun Jun nga posibleng suliran sa gugma ang naka-ingon sa tanan.

Duna matud pay gika-ibgang babaye ang suspek nga gika-ibgan usab sa biktima.

Sigun pa ni Jun Jun, may higayon nga iyang gipahimangnoan ang biktima nga kung mahimo mangita nalang og laing babaye aron dili sila magkagubot sa suspek.

Apan, ning tanan gibalewala matud pa sa biktima ug hayan sa iyang pagka ‘maldito’ natigbasan gyud kini sa suspetsado.

Gidali pagdala ang biktima sa Northern Mindanao Medical Center (NMMC) ning sIyudad sa Cagayan de Oro aron patambalanan sa samad tinigbasan nga iyang nahi-agoman.

Sa inisyal nga imbestigasyon sa mga otoridad gitigbas ang biktima dihang wala kini nakamatikod sulod sa ilang panimalay.

Pag-igo matud pa sa mahait nga pinuti ngadto sa iyang lawas, gilayong nagpakitabang ang biktima, rason nga mikagiw usab ang suspek.

Hinuon subay sa ulahing taho luwas na sa makuyawng kahimtang ang biktima samtang padayon usab nga gipangita ang suspek.