(Tungod sa Alabang Boys isyu) PDEA-10 OKs sa drug test sa mga opisyales

Daw dili matud pa katuohan ang alegasyon sa uban nga nalambigit ang pipila ka tag-as nga opisyal sa Philippine Drug Enforcement Agency (PDEA) dinhi sa rehiyon 10 sa mga sindikato kinsa gapayuhot ug gabaligya og gidiling droga.

Kini ang gihingusgan ni Juliet Caganan, tigpamaba sa PDEA rehiyon 10 atol sa pakighinabi sa Brigada News.

Siya miignon kung ipa-ilawom sa drug testing ang mga opisyales sa PDEA, hayan wala siya niini pagsupak.

Isip usa sa mga opisyales sa nasampit nga ahensya, pagpakita lamang og maayong ehemplo ngadto sa publiko ang pag-uyon sa gilaraw nga drug testing.

“Siyempre, kami ang law enforcer, dapat lang mahimo sab mi nga good example,” siya mikanayon.

Gidugang sa opisyal nga sa pagkakaron, nagpadayon ang ilang kampanya batok sa gidiling droga.

Matud niya, ila pang gipalapdan ang information campaign ngadto sa publiko labot sa dautang epekto niini. Iyang gipasabot nga gisugdan kini ngadto sa tanang tunghaan dinhi sa rehiyon.

“So far so good ang atong mga programa, gani ubay-ubay na usab ang atong mga nasikop kinsa nag-violate sa balaud,” gidugang pa sa opisyal.

Hinuon, giklaro pa usab sa nasampit nga opisyal nga lakip nilang gihatagan og igong pagtagad ang walay puas nga pagkaylap sa mga bata kinsa kanonay masikop nga gagimhot og rugby.

Kabahin usab kini sa ilang kampanya. Kutob sa ilang madakpan nga mga menor de edad ilang itugyan ngadto sa Department of Social Welfare and Development (DSWD).
Apan, kung duna matud pa silay masikop nga edaran o hamtong kinsa gapayuhot sa gihapon og rugby ila na kining ipaslak gilayon sa selda.